فى التاريخ

التاريخ من وجهة نظرنا هو علم من العلوم الظنية كأى علم من العلوم الحياتيه معرض للصواب و للخطأ لعدم عصمة اى بشرى من الوقوع فى الخطأ و كلنا نعلم ان العلم هو عبارة عن تعبير لفهمنا للواقع و التاريخ علم بيعرفنا كل ما هو قديم من اخبار و تعليق عليها من المؤرخين اللى بيكتبوا الأخبار دى و الاثار اللى بنلاقيها و المخطوطات ...الخ و عند الاخذ بالأدلة التاريخية المكتوبة لا يجوز اخذها من مصدر واحد حتى لو كان المصدر ده هو المصدر الصحيح بنسبة 100 % كما يقال احيانا و حتى لو كان المصدر ده مصدر من مصادر حضارة تانية ... مفيش حاجه اتسجلت الا و ليها فايدة حتى لو كان اللى اتكتب تدليس وكدب ... ليه ؟؟ ... احنا منعرفش اساسا الخبر الصحيح علم التاريخ ده مبنى على كل ما وصلنا من اخبار و قصص و مخطوطات و اثار و اى حاجه بتشير للحقبة اللى الخبر التاريخى ده بيحكى عنها فبكده كل ما يمت للمرحلة دى بصلة فهو مهم للفهم ... يعنى اى اثر يتم ايجاده او اى مخطوطة او اى شئ بتقربنا اكتر للفهم ... بتقربنا اكتر للتوضيح الحقيقى ... مفيش حاجه مسلم بيها و مفيش حاجه صح 100% ابدا ... طبعا احنا بنستثنى الأحداث التاريخية المذكورة فى الروايات الدينية دى ليها حسابات اخرى ...

و بكده علم الاثار و علم التاريخ زى النظرى و العملى هما الاتنين وجهين لعملة واحدة الاتنين مهمين ... و طبعا بيساعدهم كل تخصص بيدرس اى حاجه قديمة من مخطوطات و غيرها ...

فأى حاجه بتتكتب و بتكتشف من أخبار قديمة او اثار يجيب انها تتحلل تحليل منطقى و قبلته او رفضته دى حاجه ترجعلك 

فتحاول دايما تسمع زى القاضى من جميع الأطراف و تقرر انت بقى رأيك فى النهاية ... و رأيك ده هيكون جزء من شخصيتك و جزء مهم و هو فهمك للدنيا وصلت للى موجودة عليه ده دلوقتى ازاى و تستفيد منه فى فهم اى حاجه بتسمعها و تبنى رأيك فيها بشكل مدروس و موزون ... تختار اية و تسيب اية ... تحب الناس دى و لا تكرههم ... عشان كده ... دايما بنصنف علم التاريخ من العلوم الانسانية فى اوقات كتير ... حاجه بتبنى شخصيتك ... ده غير فوايد كتير للعلم ده ... تقدر تعرف بيه قواعد هندسية قديمة مش مستخدمة دلوقتى ... تعرف تطور حاجه الناس وقفت التطور فيها زمان فتدرسها بصورة احسن و ترجعها بصورة اقوى ... تعرف تبحث عن شئ مفقود و مهم ... تعرف تستفيد بخبرات سياسية قديمة و تعلى من شأن سياسات حالية ... تعرف سلوكياتنا دلوقتى ممكن توصلنا بعدين لحد فين ... ليها فوايد كتير جدا .



ايوة بس التاريخ بيتكتب من ناس ممكن تغير فيه بالتعاليقات دى و ممكن تحرف فيه فأزاى يا كبير هنفهم الصح ؟؟ و ازاى اصلا نقول ان ده مصدر صحيح بنسبة 100 % من عدمه ؟؟ ... ازاى ؟؟

بص .. اولا خلينا متفقين على حاجه التاريخ كله اساسا ممكن يبقى مش صحيح بنسبة كبيرة و ممكن يطلع صحيح بنسبة كبيرة انت مشوفتش حاجه ... بس طول ما انت بتسمع الاخبار كلها و بتجمعها صح و بتعرف كل الزوايا على قد ما تقدر هتقرب للصح و هتعرفه غالبا و برضه هتقول الله اعلم ... البحث بتاعك مش لازم يكون زى ما حصل و صحيح لكن انت وصلك على الأقل جزء من الحقيقة اللى مبنية عليها الدنيا دلوقتى و الجزء ده هيبقى مهم من جميع الجوانب حتى الجوانب الدينية ... هيخليك تفهم الدنيا من حواليك ...


فأنت زى ما قلنا دايما تشوف الأخبار على قد ما تقدر بس دايما تكون مقتنع ان اللى عندك من اخبار هو قابل للتجديد بمجرد وصولك لمعلومة جديدة ... و تحاول تعرف اية اتجاه اللى بتاخد منه المعلومة التاريخية عشان لما بتعرف الأيدولوجية بتفهم اكتر ... و أقرأ تاريخك من عدوك برضه و اعرف كاتب عنك اية ممكن يكون نبه على حتة انت محتاج تصلحها فى نفسك او حتى أفترى عليك فيها فتعرف بيقول اية ...



طب يا كبير ده معناه ان ايدولوجيتك انت كمان هتأثر فى فهمك للأحداث مش كده ؟؟ 

صحيح ... هى الدنيا كده ... لازم التنوع و الأختلاف و طالما الأختلاف بالأخلاق فمش هيكون في مشاكل ... لازم يكون ليك اتجاهك و هويتك و ايدولوجيتك و عقيدتك الدينية و الحياتيه و كل ما تريد ... انت بيعرض عليك الطريق ده و الطريق ده و انت بتختار فى الأخر ... العقيدة ليها تأثيرها طبعا و ده الطبيعى فى الدنيا كلها ... عشان كده فهمك ايدولوجية اللى كتب الكلام ده بيكون مفيد و مهم ...
ده انا هقولك على الأسوء من كده ... العلم اثبت الفترة دى انك مينفعش نثق فى ذاكرة حد بنسبة 100 % ... و ان الذاكرة ممكن تملى على الشخص نفسه حاجات مش موجودة ... فضرورى جدا انك تقرأ من كل واحد كتب اية و عايز اية ... هتقرب للحقيقة اكتر ...



طب دلوقتى معلش برضه اية فايدة كل البحث الدقيق ده فى الاخر اية فايدة التاريخ ؟؟

فايدة التاريخ فى كذا حاجه غير اللى بيتقالنا كل يوم ... زى مثلا اننا نفهم الأهرامات اتبنت ازاى فنحاول نقفز سنين بالهندسة على ما هى عليه دلوقتى و نفهم التحنيط فنعمل نفس الشئ فى مجال الصيدلة لأن العلوم القديمة هى روح العلوم الحالية و اساسها و كون اننا منعرفش الحاجات دى تمت ازاى يبقى العلم فى جزء منه اختفى فى فترة لسبب مجهول و اضطررنا كلنا اننا نبدأ من الصفر فعيب علينا لما نكون فى عصر متقدم زى ده و منعوضش اللى حصل ... هو لازم دايما ابدأ من الصفر ؟!!! ... ليه منكملش على اللى فات ؟ ... لو غلط و مش متوافق معانا نسيبه و نشوف غيره ...


و أحد الأدلة على كده ...كان فى فترة من الفترات عايشين فى أوروبا فى العصور الوسطى و كان الحلاقين بيعملوا عمليات جراحية ... الحلاقين !! ... 

طيب عايزك تتخيل يا طيب لو كانوا فى العصر ده بدل ما كانوا بيعملوا كده ... كانوا يتبعوا على الأقل الفراعنة اللى قبلهم بالالاف السنين ... 


 بردية ادوين اسميث فى الطب المصرى القديم


طبعا ده كان مستحيل لأن الفراعنة كانوا ناس غريبة عنهم لأن محدش اهتم بتاريخ الفراعنة او البحث فيه او فك طلاسمه اللى استمرت لقرون و لو كانوا قلدوهم و مقلدوش المسلمين كان هيبقى خير اكبر ليهم بدل اللى كانوا بيعملوا من جهل ده ....


فى مكتبات كتير اتحرقت زى الاسكندرية و بيت الحكمة و مخطوطات و كتب بياكلها النمل فى تمبكتو و كتب ادفنت تحت التراب فيها علم مفيد و فى حتت كتير من العالم كتب اختفت لأسباب متعددة ... كل ده سبب تأخرنا فى فترة ... فعلى قد ما نقدر ممكن نجيب اللى تبقى منه عشان نمشى حياتنا اسرع و نعوض اللى فاتنا كلنا ... نخلى العالم مكان اكبر و افضل بتقليل التلوث و الطاقة المستهلكة بأننا نفهم ازاى زمان كانوا عايشين بدون مشاكل فى جوانب معينة عندنا فيها مشاكل مثلا و حياتهم كانت بسيطة و لا صعبة بحيث ننفذ بطريقة اكبر تقنيات كانت موجودة فى العصور دى ... و نطورها كمان بطريقتنا دلوقتى ...

ممكن مكنتش تعرف ان شوية كلام لقيته فى اى مخطوطة كان يوصلك مثلا لفلوس و الفلوس دى كانت اوزان لمقادير ادوية معينة و مفيدة فى علاج مرض مش عارفين ليه علاج دلوقتى فننقذ و نساعد ...


صورة عشوائية من احدى المخطوطات العربية 

نكتشف شئ يساعد على فهم قصة معينة فى الدين مثلا ... و توابع حاجه زى كده على المكان اللى كانت فيه ... فناخد العبرة و الموعظة و نحاول نتفادى الأخطاء بدل ما نقع فيها تانى ...

التاريخ مش تعليقات بس ... ممكن نستفيد بيه كلنا بأشكال مختلفة و صور كتير جدا ... نبش الماضى مش دايما سيئ ... السيئ اننا منتعلمش من اللى حصل زمان ...

طيب هو فى كام لينك لازم تشوفهم هيعرفوك تتعامل مع الكلام ده اللى احنا قولناه و تفهمه كويس ازاى ... فى حاجات زى زراعة ذاكرة ... ذاكرة خادعة حاجات كده من الجو ده و احنا خلاص المفروض متفقين ازاى نتعامل مع كل ده ... شغل القاضى اللى قدامه أدلة و بيتعامل معاها و واخد كل شئ فى الحسبان عشان يوصل لكنز يوصل لحقيقة يوصل لدوا يوصل لأثر مهم يوصل لأى شئ مش شرط يكون كلام لكن شئ ملموس زى ما قلنا ...



ممكن تنزل كل الكلام ده من هنا لو انت شايف انه كويس و عايز تستفيد بيه فى انك تحطه كأراء ليك و انت موافق عليها على موقعك على الفيسبوك بتاعك على اى حاجه عايز تعمله فيديو مثلا اى استخدام مسموح ليك ... اتفضل ... بس يا ريت لو هتستخدمه فى اى شئ غير الاستخدام الشخصي انك تقول خدته منين بس لو مش هتقول مفيش مشاكل برضه ... احنا بنتعلم احنا مش جامدين اوى كده ... براحتك

و شكرا